NONNICEIA MIA

( POESIA IN DIALETTO CALABRESE)

donna_nonna_in_cucina_01.jpg

Chi boi mu ti dicu nonna mia!

Ca passaru tant’anni e ancora penzu a tia,

bella,rugosa e fatigata

nonna duci, nonna adurata.

Tutti riuniti ‘ntornu a tia…

na rota, nu vrasceri e nu saccu d’allegria;

penzu a lu caluri chi nta chija casa nc’era,

lu focu, lu fumu chi nescia da ciminera;

‘ndi cuntavi tanti stori… era bellu ‘nzemi a tia,

tu donna di casa e di chjesa, fimmana pia;

mentri sferruzzavi chjanu all’uncinettu,

a tutti li niputi ‘nci dunavi lu pastettu.

Ohi chi tempi! Ohi chi profumu…

chi gioia ‘nta l’aria e ‘nta la famigghia.

Nonniceia mia mi manchi tantu,

mi manca di chija epuca… la sustanza,

di chiu veru mundu l’innucenza.

Ti vogghiu beni e non tiservi cchiù nu hjùri

ma sulu na poesia mu t’arricriji u cori!!!

Teresa Averta

Annunci