FIMMANA MIA

17103358_10208355014058361_6760872113699030277_n

Oji, vogghjiu mu ta dicu
E mu ta dicu in dialettu,
pecchì lu cori batti
d’amuri dintra o pettu.

Si tu l’amata mia,
tu, pezzu du cori mio
si l’urna sacra mia
a megghjiu criatura i Dio.

Cumpagna i viaggiu
di vita e di venturi,
amanti di stu corpu:
si cruci e redenturi.

Si angelu senz’ali e sai volari…
Si donna e matri di lu foculari
Fimmana vera, fimmana chi bali
Testa cocciuta e carni passionali.

Oji, vogghjiu mu ta dicu
E mu ta dicu in poisia
Si jiuri culuratu
Giardinu ‘i fantasia.

Si rosa e virgultu
E terra i chjiantari
Si cocciu di ranu
Chi si pò siminari.

Senza i tia e luntanu i tia
c’è pocu e nenti i fari.
Senza na fimmana
su iorna longhi e amari.

Tutti i poeti di lu mundu ti cantaru…
omani tradituri i tia s’alluntanaru.
Fimmana mia, chiji chi pe ‘ttia ciangiru
a la santa vergini, l’anima votaru.

Li figghji si ‘ndi jiru fora e poi tornaru
Pecchì la mamma è nu tesoru raru…
Na fimmana è ventu duci e t’accarizza
Na fimmana è donu, e ‘na ricchizza.

Oji, vogghjiu mu ta dicu
E mu ta dicu in preghiera:
Si tu a cchiù bella stagiuni
l’Eterna Primavera.

Teresa Averta

Annunci