FIMMANA MIA

28684832_10211153884388370_1096696293893341184_n.jpg

Oji, vogghju mu ta dicu
e mu ta dicu in dialettu,
pecchì lu cori batti
d’amuri dintra o pettu.

Si tu l’amata mia,
tu, pezzu du cori mio,
si l’urna sacra mia,
a megghju criatura i Dio.

Cumpagna i viaggiu
di vita e di venturi,
amanti di stu corpu:
si cruci e redenturi.

Si angelu senz’ali e sai volari…
Si donna e matri di lu foculari
Fimmana vera, fimmana chi bali
Testa cocciuta e carni passionali.

Oji, vogghjiu mu ta dicu
e mu ta dicu in poisia
Si jiuri culuratu
e giardinu ‘i fantasia.

Si rosa e virgultu
e terra i chjantari
Si cocciu di ranu
chi si pò siminari.

Senza i tia e luntanu i tia…
nc’è pocu e nenti i fari.
Senza ‘na fimmana,
su iorna longhi e amari.

Tutti i poeti di lu mundu ti cantaru…
sii a cchjù bella stella chi l’angelu calaru
chiji chi ti perdiru e poi ciangiru,
a la santa vergini, l’anima votaru.

Li figghji si ‘ndi jiru fora e poi tornaru
pecchì la mamma è nu tesoru raru…
‘Na fimmana è ventu duci e t’accarizza
‘na fimmana è ‘nu donu e ‘na ricchizza.

Oji, vogghjiu mu ta dicu
E mu ta dicu in preghiera:
si tu, a cchiù bella stagiuni
si tu, l’Eterna Primavera.

Teresa Averta

-Immagine della grande attrice Anna Magnani-

Annunci